Русинські діалекты

Карпаторусинськый язык, так ги и булшина языкув, ся дїлит на наріча — пудкарпатськоє тай лемковсько-пряшовськоє, а тоты зо свого боку ся дале дїлят май додрубна на діалекты. Конкретні гатары шак тоты діалекты не мавут, респ. уни ся годни міняти подля того, які рисы автор єдної вадь другої класіфікації руснацькых діалектув раховав за май важні тай діалектообразувучі.

Пестрость діалектув є характернов про такі реґіоны ги Пудкарпатя — краина подїлена горныма гранкама тай ріками на убгороджині теріторії, котрі ся розвивали май ізоловано єдна уд другої, без частых контактув, позад чого ся там сформовали рузні говоры тай діалекты. Сяка сітуація є тіповов про гористі краины, сут трафункы, де сосїдове за гранков хоснувут не лем рузный діалект, а и языкы из рузных языковых ґруп.

Класіфікація

У днишнюй лінґвістицї є дакулко рузных класіфікацій карпаторусинськых діалектув (притум не усе ся за описуємый діалект говорит, ги за діалект, напр. Ґеровськый пише за «говоры карпаторуського наріча малоруської ґрупы руського языка», што шак не вплыват на фаховость описа), котрі ся у даякуй мірї рузнят єдна уд другої. Єдныма из майзнамых сут класіфікації Ґеорґія Ґеровського тай Йосифа Дзендзелївського а Зузаны Ганудель.

У матеріалах описувучых конкретні діалекты ся хоснує класіфікація Ґеровського, главно позад того, ож уже была захоснована и у другых роботах за карпаторусинськый язык (поз. Книговниця, Русинськый язык).

Карпаторусинські діалекты за класіфікаціёв Ґеорґія Ґеровського

У своюй роботї «Jazyk Podparkatské Rusi» 1934. рока автор дїлит бисїду Пудкарпатської Руси на вусям пудкарпатськых говорув — южномараморошськый, сїверомараморошськый, бережськый, ужськый, восточноземплінськый, западоземплінськый, шарішськый а спішськый, и на сїверокарпатські говоры, коріня котрым є мімо Пудкарпатя — верховинськый, гуцулськый а говур села Розсошкы. Окреме щи пише и за тзв. «мішані говоры» — пудкарпатські говоры выразно овплывнині говорами сїверокарпатськыма, вадь даякыма другыма.

Єдным из главных крітеріюв дїленя пудкарпатськых діалектув у класіфікації Ґ.Ґеровського є уговорёваня старого ó у запертых складах, котроє у тых діалектах ся перечинило майчасто на у, май рідко на ü.

Схоснуйте спис удкликовань на подробні матеріалы за пудкарпатські діалекты, котрі ся стрічавуть на днишнюй Закарпатськуй области Украины а восточнуй Словакії.

• Пудкарпатські діалекты

• Бережанськый
• Ужанськый
• Сїверомараморошськый
• Южномараморошськый
• Восточноземплінськый
• Звалськый